Søte plagg til søte små jenter

Det nærmar seg messetid igjen, så Tante Melin må fornye kolleksjonen sin litt.

 

 

Snurreskjørt i str 5-6 år. Modellen er rundklipt, så skjørtet svingar seg flott når den som har det på dansar litt. Skulle ønske eg hadde "live" bilder, for desse skjørta er verkeleg flotte på.

 

Nederst er ein liten, søt hjartekant.

 

Denne modellen lagar eg for første gong. Den kan nyttast som den er, eller om det er litt kjølig, kan ein ha ein tynn jerseygenser og strømpebukse under.  

 

Modellen har strikk i halsringinga, og falsk knappestolpe med fargeglade knappar på.

 

Ei lita lomme med blondekant har det også blitt plass til.

 

Kjolen finnast også i motsette fargar, men eg var tom for batteri, så det vart desverre ikkje fleire bilete.

 

Produkta i dette innlegget ligg i Eplabutikken min. Du finn den ved å klikke på linken oppe til høgre på sida her.

Rosa og lilla fargeklatt

Tante Melin har kosa seg på syrommet igjen. Det starta med ei lita bestilling, og etter eit djupdykk i skapet mitt, byrja kreativiteten å boble.

 

 

Bærestykket er laga av restane av ein gensar eg har brukt. Det var så fine fargar i den at eg har aldri klart å kaste den. Det er ikkje første gongen eg klipper i denne genseren, og i den gamle bloggen min kan du sjå det forrige produktet som kom ut av den.

 

 

Halsen er kanta med lilla ribb. Under bærestykket er det eit band frå Leanne og pompongar frå S&S

 

Eit par runde merker på skjørtet gav litt farge nederst på kjolen også.

Sommarkjole med vaffelsøm

Har lenge tenkt å prøve meg på vaffelsøm. Strikk har eg hatt liggjande klar i skuffa i bortimot to år, trur eg...

Vaffelsøm får ein ved å surre tynn strikk på undertrådspola og sy med det som undertråd. Til overtråd nyttar ein den vanlege tråden ein elles ville brukt. Stinglengda bør være litt lang.

 

 

I mangel på modell, får eit par vaser stabla oppå kvarandre duge. Difor dei litt merkelige proporsjonane.

 

Heilt øverst er det rullesøm og deretter søte blonder til avslutning.

 

 

Her har visst ikkje fotografen vore heilt stødig, men det er altså ein grøn kroklisse som er nederst på kanten av kjolen.

 

For den som har lyst på slik lett og deilig sommarkjole til snuppa si, så er den å få kjøpt hjå Tante Melin på Epla, der finst den i 5 ulike størrelsar.

Klar for juleball

Kvelden før kvelden fekk vi plutselig ein ide om at det skulle være ny kjole til juleballet. Til vår store lykke fann vi eit stoff med noko som likna metallmaljer i skapet.

 

 

I fronten er det sydd sammen eit par lengder svart band, og midt over dette eit sølvfarga band. På biletet under, ser ein litt betre rynkeeffekten som går heile vegen langs begge forstykka.

 

For å lage rynkene klipte eg opp mønsteret frå midt famme og nesten heilt ut i sida 8 gonger oppover langs heile fronten. Så la eg mønsteret på mønstervlies og bretta utover som på biletet under. Sidesaumen blir då akkurat så lang som den skal være, medan midten blir lang.

 

 

For å få dette i rette proporsjonar igjen, så syr ein rynketrådar og rynkar forstykka ned til rett lengde igjen. Eg sydde midt framme på begge tøystykka på eit stødig band først, og etterpå sydde eg dekorbanda på framsida

Snart klar for julemesse

Då har eg latt meg lokke til å være med på årets juleverkstad i Runnevang på Rygg. Her er nokre av kreasjonane eg skal ha med til salgsmessa.

Undertrøyer i bambus. Eit fantastisk mjukt og flott stoff som har mange av dei eigenskapane som ull har. Fint for dei som ikkje toler så godt ull nært kroppen.

Bukser og gensarar i diverse fargar og fasongar. Fleire modellar og andre fargar enn det som er vist her vert det også.

Julekjoler i ulike design blir det også med.

I tillegg til dette vil eg ha med luer og små vesker i forskjellige fargar og utformingar.

Det som vert til overs kjem eg til å legge ut på eplabutikken min over helga.

Tante Melin

Aurora design - ei artig utfordring!

For nokre månader sidan fekk eg ei lita tegning på ca 5x10 cm. Det var niesa mi som hadde designa sin eigen kjole.

Sånne utfordringar klarar jo ikkje tante å motstå.

Eg jobba ein del timar på kjolen, og eg må innrømme at eg var svært skeptisk undervegs. Eg var svært usikker på korleis dei to skarpe hovudfargane ville bli i lag.

Del på del vart lagt på framstykket, og etter kvart byrja det å likne på teikninga.

Det var faktisk nesten som å sy lappeteknikk, dette...

Banda og pompongane måtte syast på i omgangar for å sikre at det vart rett.

Stoff, band og pompongar er kjøpt på Stoff og Stil.

Regntunge sommardagar er supre sydagar!

Eg strevar fortsatt fordi symaskina mi er øydelagt, men eg har fått låne ei PFAFF 6152. Ikkje heilt ny maskin, men den er svært god. Den manglar ein del av funksjonane eg er vant til å bruke - men då må ein berre nytte fantasien i staden....

Her er enno eit eksemplar av sukkertøykjolen. Den liknar mykje på den forrige eg sydde, men blondene er frå Stoff og Stil og er ikkje elastiske, som på den forrige.

Mønsteret er fortsatt frå boka Made by me og stoffet er velour frå Stofstedet.

Over skuldra har eg slengt den nye weekendbagen min. Mønster og stoff er handla på Stoff og Stil. 

Veska knappast ned i sidene med trykknappar.  Når ein skal ha mykje med seg, er det berre å løyse trykknappane i sida, så rommar den meir.

Her er brukt eit biseband i velour. Eg tykte det var artig fordi det matchar foret i veska. I og med at det er så tjukt var det ikkje heilt enkelt å sy det pent på. 

Inne i veska er det ei lomme med glidelås og ei heilt enkel stikklomme bak denne.

Innerstoffet er velour og det er kanskje ikkje det mest praktiske inni ei veske. Om det kan være til nytte, så vert ein i alle fall i skikkelig godt humør av å sjå på det. Skikkelig gladfarge!

Frå katastrofe til suksess

Eg fekk det for meg at eg skulle sy ein Sukkertøykjole i gåve. Mønsteret finn ein i boka  Made by me.

Stoffet var bestilt hjå Stofstedet. Det eg gløymde var at det allereie var sydd ein gutegensr av stoffet, så der var ikkje lenger 3 meter å frotse i....

 I og med at det er velour, så kan ein ikkje snu delane opp ned, så juksing var absolutt ikkje tillatt. Etter mykje om og men var alle mønsterdelane plassert på stoffet og klippinga kunne starte.

Så er det no sånn, at når ein først har klipt, ja så har ein søren meg klipt....

Når forstykket skulle dekorerast, så viste det seg at forstykket var klipt mot jarkanten, og bakstykket mot brett. Det skulle vore omvendt, så då sat eg der med ein stygg saum midt framme på kjolen...

I forargelsen kasta eg frå meg arbeidet og lot det ligge eit par dagar. Etter eit tips frå ein bekjent, kom eg på at eg kunne nytte nokre av stretchblondene eg hamstra på danmarksturen i fjor.

Sånn vart kjolen til slutt. Den midterste loddrette blonda skjuler saumen, dei andre er berre dekor.

Baksida fekk kun ei enkel vassrett blonde.

Hjerta er sydd på med ein av dekorsømmane på maskina. For at dei skulle sitje stødig under monteringa, vart dei limt på med quiltespray. På undersida er det stroke på eit lag med vlieseline, slik at ikkje stoffet skal dra seg.

Den rosa kjolen er sydd etter samme mønster, men eg må seie at den grå vart absolutt mykje flottare! Banda gjer at kjolen sit penare på, så det er nesten sånn at eg lurar på om den rosa kjolen må få seg nokre blonder også.

Premiære i Noregs nasjonaldrakt!!

Etter ei alt for lang bloggpause, har eg bestemt meg for å starte heilt på nytt. Denne gong blir det ein rein hobbyblogg, og eg har skifta frå Wordpress til Blogger. Det blir spennande å sjå om det blir funksjonelt og bra.  Sidan det er premiæredag, så kler vi oss sjølvsagt i det flottaste plagget vi har - bunaden.

I vinter gjekk eg på bunadkurs for å lære å sy Nordfjordbunad, og første innlegget handlar om det.

Noko av det første som måtte gjerast var å sy på vevde band nederst på stakken.
Eg juksa litt og kjøpte ferdig vevde band. Har ingen intensjonar om å bli bunadsyar på heiltid, så det er ikkje alt eg ser meg nytte i å lære...

 

Litt instruksjonar må til undervegs.

Så skal det merkast opp før ein kan byrje å lage legg på stakken. Det vanlige utstyret til lappeteknikk duger godt til slikt arbeide også.

Deretter skal ein folde etter oppmerkingane

Så ser det sånn passelig rart ut ei stund. Blir heldigvis betre etter at brettane har lagt i press. Stakken låg i press i 6 veker før eg fortsatte arbeidet med den. 

 

Livstykket blir sydd ferdig, og så syr ein band over alle saumar og kantar.

Framsida på livstykket.

Her, sånn ca midt på stoffet skal det altså bli ein hals. Eit lite, firkanta stoffstykke skal syast inn der stoffet er klipt som ein T.  Ein nokså underlig konstruksjon, men det fungerer faktisk heilt supert.

Her er firkantstykket på plass, og det liknar faktisk litt på ein krage. I toppen her blir det sydd rynketrådar, slik at ein får små piperynker i halsen der kragen skal syast på.

Her ser ein piperynkene  og broderiet på kragen. Broderiet heiter krunekret.

Der finst utallige variantar av lomma til Nordfjordbunaden. Ein kjenning fortalte at ho hadde talt 21 ulike lommer på eit og same 17. mai arrangment.

Her har frøkena fått på seg finstasen. Eg var ikkje heilt fornøygd med at lomma drar ned forkledet, så i ettertid sydde eg eit band på stakken, slik at lommespenna kan stikkast nedi der og kvile på bandet i staden for på beltet.