Søte plagg til søte små jenter

Det nærmar seg messetid igjen, så Tante Melin må fornye kolleksjonen sin litt.

 

 

Snurreskjørt i str 5-6 år. Modellen er rundklipt, så skjørtet svingar seg flott når den som har det på dansar litt. Skulle ønske eg hadde "live" bilder, for desse skjørta er verkeleg flotte på.

 

Nederst er ein liten, søt hjartekant.

 

Denne modellen lagar eg for første gong. Den kan nyttast som den er, eller om det er litt kjølig, kan ein ha ein tynn jerseygenser og strømpebukse under.  

 

Modellen har strikk i halsringinga, og falsk knappestolpe med fargeglade knappar på.

 

Ei lita lomme med blondekant har det også blitt plass til.

 

Kjolen finnast også i motsette fargar, men eg var tom for batteri, så det vart desverre ikkje fleire bilete.

 

Produkta i dette innlegget ligg i Eplabutikken min. Du finn den ved å klikke på linken oppe til høgre på sida her.

Rocka genser for tøff tenåring

Etter ein kjempelang ferie har Tante Melin leita fram sysakene igjen. Som vanleg vart det kjøpt alt for mykje stoff og sytilbehør, og no er det på tide å prøve å bruke det opp. Det er faktisk ikkje plass i skapa mine lenger.....

 

 

Første prosjekt var ein ny genser til tenåringsguten. Denne er sydd av samme mønster som eg har nytta tidlegare. Den er litt lang, men tanken er at karen er i vekst - så om litt er den nok akkurat passeleg.

 

Det mønstra stoffet er bommullsjersey, og om ikkje eg hugsar heilt feil fann eg det på Hüco stoffe i Berlin. Denne sjappa hadde stort utvalg i stoff, og hadde det ikkje vore for at eg hadde sykla langt i 36 grader varme for å komme dit, så hadde det vore ei fantastisk oppleving å rusle rundt der. Eg var ein smule dehydrert og kokt når eg kom fram, og det begrensa handelen - kanskje like greit for lommeboka sin del.....

 

Det einsfarga er ribb frå Stoff og stil, som vi snubla over i Malmø.

Fram- og bakstykket på armane har fått ulike stoff, slik at ikkje det mønstra stoffet skal verte alt for dominerande. Det er også ribb i midjen og rundt armane.

Stilige raglangensarar til gutar/ungdom

Det er neimenn ikkje enkelt å finne stoff som egnar seg for karar som er litt over småbarnstadiet, så når eg kjem over noko bra er det berre å slå til med ein gong.  Dette sneakers-stoffet kom eg over på Stoff og Stil for litt sidan.

 

 

Eg er ikkje sikker på kva type stoff det er, om det er tjukk jersey eller isoli. Stødig og godt stoff som egna seg til større plagg. Armar og lommer er sydd av mørk blå ribb.

 

Uttapåsydde lommer med plass til nettbrett eller telefon er eit must.

 

Ein raglangensar i eit anna stilig stoff frå samme sjappe. Dette er å finne i årets katalog som stretch jersey.  Stoffet er litt tynnare enn sneakers-stoffet, men også dette er stødig og godt.Armane og lommene er sydd i ribb.

 

Nærbilde av det utruleg stilige printet.

 

Også her store utanpåsatte lommer.

 

Bilgenseren finnast i Eplabutikken min i størrelsane 4-6 og 8 år

Rosa og lilla fargeklatt

Tante Melin har kosa seg på syrommet igjen. Det starta med ei lita bestilling, og etter eit djupdykk i skapet mitt, byrja kreativiteten å boble.

 

 

Bærestykket er laga av restane av ein gensar eg har brukt. Det var så fine fargar i den at eg har aldri klart å kaste den. Det er ikkje første gongen eg klipper i denne genseren, og i den gamle bloggen min kan du sjå det forrige produktet som kom ut av den.

 

 

Halsen er kanta med lilla ribb. Under bærestykket er det eit band frå Leanne og pompongar frå S&S

 

Eit par runde merker på skjørtet gav litt farge nederst på kjolen også.

Skjørt med knyting i livet

Eg kom over ein tutorial på eit skjørt eg likte så godt hjå Sewing in no man's land.

Dette skjørtet kjem eg nok til å lage fleire av. Måtte først berre sjekke om eg verkeleg fekk det til slik det skulle være.

 

 

Dette skjørtet passar ein toåring - det var omlag samme livvidde som blomstervasane mine :)

 

I livet er det okergult bommullsstoff med romantiske blomster. Midt framme er livstykket breidt, medan bak er det smalare. Dette gjev ein kjempefin effekt når ein knyter bandet framme.

 

Bak er det glidelås.

 

Skjørtet er å få kjøpt hjå Tante Melin på Epla

Sommarkjole med vaffelsøm

Har lenge tenkt å prøve meg på vaffelsøm. Strikk har eg hatt liggjande klar i skuffa i bortimot to år, trur eg...

Vaffelsøm får ein ved å surre tynn strikk på undertrådspola og sy med det som undertråd. Til overtråd nyttar ein den vanlege tråden ein elles ville brukt. Stinglengda bør være litt lang.

 

 

I mangel på modell, får eit par vaser stabla oppå kvarandre duge. Difor dei litt merkelige proporsjonane.

 

Heilt øverst er det rullesøm og deretter søte blonder til avslutning.

 

 

Her har visst ikkje fotografen vore heilt stødig, men det er altså ein grøn kroklisse som er nederst på kanten av kjolen.

 

For den som har lyst på slik lett og deilig sommarkjole til snuppa si, så er den å få kjøpt hjå Tante Melin på Epla, der finst den i 5 ulike størrelsar.

Skotsikker....

 

Eg fekk i oppdrag å lage ein premie til eit handballotteri. Kva er då meir naturleg enn å nytte siluetten av ein skotsikker handballspelar?

 

 

Løparen er heilt enkel og grei, sydd saman av 3 inch store kvadrat. Einaste stashet er handballspelaren som er applikkert på med maskin. Den er frihandsquilta med stoppefoten.

Eg har fleire løparar som er like enkelt laga, og eg tykkjer ofte dei er finast. Då passar dei til dei i grunn til det meste.

 

 

Har laga ein handballpremie med samme siluetten tidlegare også.

Då vart det ei toalettveske. Firkantane på den var mindre, og den vart quilta diagonalt gjennom alle hjørna. Artig å sjå kor ulikt uttrykket blir når ein endrar quiltemåte.

Hettejakke til ein tenåring

Det er slett ikkje lett å finne stoff som passar til klede for tenåringsgutar, men dette stoffet i økologisk bommull var jo heilt midt i blinken!

 

 

Mønsteret er printa ut frå ein mønstercd frå Kreativ.

Rundt armane og nederst på jakka er det svart ribb.

Julegåvesying

Også denne jula vart det julegåvesying til søte små familiemedlemmer. Ingen som slepp unna når ein har Tante Melin i slekta ;)

 

 

Ei niese fekk sett med bukse og genser. Genseren er sydd av frotte med elghovud frå Stoff og stil. Dette stoffet tykte eg var særdeles artig, og har lurt på kva eg skulle finne på å bruke det til.  

 

Buksa er i svart kordfløyel. Lommene er utanpåsydd av det samme elgstoffet som er i gensaren. Desverre var kordfløyelen litt stiv, så eg håpar den vert mjukare i vask og litt bruk. Midjen er laga av ribbstoff, slik at den ikkje skal bli stiv å gå med.

 

Mannen i huset er fadder på ein tøff liten kar. Han fekk seg genser i Stenzostoff med amerikanske stempelmønster.

Genseren er av samme type som eg har sydd før, men etter tilbakemelding frå brukarar har eg forlenga mønsteret med 2-3 cm, slik at den ikkje skal være for kort i ryggen.

 

Dette settet er sydd i bambus frå Myllymuksut. Dette kan brukast under f. eks ein kjole, eller som undertøy. Bambus har antibakteriell virkning, er veldig motstandsdyktig mot sopp, og er fuktabsorberande. Det er utruleg mjukt og deilig, og klør ikkje. Med andre ord er det perfekt å ha innerst mot kroppen.

Knytetopp

Dottera mi kom med bestilling på knytetopp.

Eg brukte mønsteret til ein vanleg, enkel genser som mal. Forstykka teikna eg på frihand og ryggstykket vart klipt av i livet, resten av mønsteret nytta eg som det var.

 

 

Når toppen er knytt ser den slik ut. Den er penare med matchande plagg under, men det er lett å sjå fasongen når ein fotograferer med kontrastfarge.
 

 Om ein ynskjer det, kan forstykka henge fritt utan å knyte. Ganske stilig med skjerf og langt smykke til.

 

Ryggen er klipt av i livet.
 

 

Uruleg flotte bilder gjer at sjølv det enklaste plagg blir ein fantastisk kreasjon.

Stoffet er kjøpt på Stoff og Stil.

Puse pute

Her huset er det Kåre som er sjefen. Kåre er katta, og han kom til oss for ca 2 år sidan. Han var nesten 3 mnd gammal når vi fekk han, og då var han både folkesky og sjuk.  No er Kåre frisk som ein fisk, men er fortsatt ganske skeptisk av seg. Han veit akkurat kva han vil ha i matskåla, han bestemmer når vi skal stå opp og han vil aller helst at vi skal åpne ytterdøra idet vi har sett oss i godstolen - ein ganske så eigenrådig sjef, med andre ord...

Etter at eg trekte om spisestuemøblane i august hadde eg litt møbelstoff til overs. Nokre breie blonder som eg har hatt liggjande i skuffa ei stund passa heilt perfekt til pynt på kantane rundt puta.

Biletet er printa ut på printerstoff. På baksida strauk eg applikasjonsvlieseline, slik at det var lett å stryke biletet fast på forsida av puta. Rundt biletet sydde eg med pyntesaum på symaskin. Ei kroklisse og ein rest blonder vart ramma rundt biletet.

På baksida er det glidelås, slik at det skal være lett å ta ut innerputa ved vask.

Kårepus har sjekka resultatet - og sjefen ser i grunn ut til å være fornøygd med resultatet

Løpar del 5, lukkekant

Då er det klart for siste økt i prosjektet, lukkekanten skal på. Også lukkekanten kan syast på på ulike måtar. Eg tykkjer absolutt at eg får penast resultat når eg syr den til for hand på baksida. Dette tek nok litt lenger tid, men det er arbeid som kan gjerast medan ein kikkar på TV eller skravlar med andre.

Det første eg gjer er å reinskjære kantane. Dei fleste har sikkert opplevd at uansett kor nøyaktig ein er under heile prosessen, så vil det være behov for bittelitt korrigering til slutt likevel.

Bruk skjæreverktøyet slik som vist i tidlegare innlegg om løparen.

 

Remsa eg syr lukkekanten av brukar eg å skjære i 5 cm breie remser, og sy saman til ei remse som er minst 20cm lenger enn lukkekanten som skal syast, gjerne meir på store prosjekt. Legg enden på remsene rette mot rette i 90grader slik som biletet over viser. Det kan være lurt å teikne ein blyantstrek i diagonalen før ein syr, slik at du lett ser kor sømmen skal gå. Sy rettsøm over diagonalen. Om du nyttar kort stinglengde er det ikkje naudsynt å feste start og slutt på saumen.

 

Klipp av overskytande stoff, slik at du har eit vanleg saumromm att på baksida. Når du no brettar ut stoffet, har du ein diagonal saum på remsa. Ein diagonal saum gjer at sømrommet blir forskyvd når remsa blir bretta og skal syast på baksida.

 

Legg remsa dobbel, vrange mot vrange og stryk med strykejarnet.

 

Legg remsa kant i kant med løparen. Eg brukar å byrje saumen ca midt på ei langside av løparen. Lat der vere ca 20 cm av remsa som heng laus før du startar å sy saumen (sjå bilete lenger nede). I hjørnet avsluttar ein saumen med å sy 45grader ned mot hjørnet av løparen. Sjå biletet. Om du nyttar kort stinglengde slepp du feste tråden.

 

Så brettar du slik at lukkekanten ligg i 90 grader oppover, vekk frå sjølve arbeidet.

 

Hald ein finger på bretten og brett no tilbake ein gong til, slik at lukkekanten ligg langs den neste kanten som skal syast på løparen. Start å sy baklengs ca 1 cm frå bretten og til ca 0,5 cm frå bretten. Då er saumen festa, og du kan sy vidare på lukkekanten, til du kjem til neste hjørne. Gjenta samme prosedyre til du har sydd alle hjørna ferdig.

 

Her ser du korleis eit ferdigsydd hjørne ser ut før det blir bretta rundt til baksida.

 

 

Når du er komen rundt til den første langsida igjen, skal dei to endane av lukkekanten skøytast saman.

 

Klipp lukkekanten slik at endane ligg litt mindre omlapp enn breidda på lukkekanten er. Ved å lage lukkekanten litt stram, unngår du at det blir rynker når du syr den fast.

 

Legg endane på lukkekanten rette mot rette i omlapp på  90 grader. Tegn opp diagonalen og sy ein søm på samme måte som når du skøytte remsene tidlegare.

 

Legg lukkekanten langs kanten på løparen og sy fast resten.

 

Då er det klart for å vende lukkekanten over på baksida av løparen.

 

 

Sy fast lukkekanten for hand på baksida. Prøv å sy med små sting som viser så lite som mogeleg på baksida. Bruk gjerne knappenåler for å holde på plass lukkekanten undervegs. Hjørna er lettare å få pene om du set i eit par nåler for å holde på plass når du syr.

 

 

Då er arbeidet gjordt. Mange små bitar og mange timar med kosearbeid har blitt til ein flott løpar.

Håpar du har hatt nytte av steg-for-steg innlegga mine. Berre å spørre i kommentarfeltet om det er noko du lurar på :)